Груниште, Мариово – фото галерија

Иако во село Груниште денес живеат 2-3 фамилии кои се занимаваат со сточарство, може да се каже дека тоа е заборавено од државата. Имено патот кој води до селото е во лоша состојба, а воедно ова е едно од ретките села кои не се поврзани на водоводна и електрична мрежа.

Цркви во село Груниште

Во село Груниште има две цркви, Св. Димитрија и Св. Петка.

Црквата Св. Димитрија е изградена 1860 година. Претходно во неколку наврати месното население се обидело да ја изгради, но истата била туркана
од турските власти.

До црквата има изградено камена камбанарија, а во рамките на црквата се и селските гробишта, каде се закопани српски војници и еден бугарски генерал кои загинале во близина на селото за време на Првата светска војна.

Црквата „Света Петка,, изградена е 1925 година од извесен Ристе Венин, кој на влезот на црквата поставил спомен плоча, која и денес се наоѓа на истото место.

Во црквата има извор со вода, за кој месното население верува дека е света – лековита вода.

Село Груниште за време на Првата светска војна

Во близина на селото се наоѓа месноста Грунишки Вис, која била важна стратешка точка на Македонскиот фронт за време на Првата светска војна. На неколку места во селото и околу црквата Св. Димитриј може да се видат гробови на војници кои загинале во близина на селото. Поголем дел од гробовите се од српската војска, а според кажувањето на локалното население имало и гробови на француски војници.

Во близина на Грунишки Вис има спомен плоча посветена на Војвода Вук, кој загинал при офанзивата на 29 ноември 1916. Војвода Вук прво бил погребан во српските гробишта „Зејтинлук,, во Солун, од каде во 1923 година е преместен во „Новите гробишта“ во Белград.