Скочивир – село во Општина Новаци

Скочивир - село во Општина Новаци
Back
Next

Село Скочивир

Село Скочивир за првпат се споменува во пописните турски дефтери од 1468 г. Сместено на 600 м надморска висина, во близина на селото Црна Река влегува во клисурата, односно прекинува нејзиниот „мирен тек“. Од тука се претпоставува дека потекнува и името на селото, односно од зборовите: скокни вир или скочи вир.

Skochivir (Скочивир) village in Novaci MunicipalityСкочивир се наоѓа на левиот брег на Црна Река и тука започнува најдолгата клисура во Македонија, „Скочивирска Клисура“, долга 104 км. Во овој дел на Црна Река, рељефно се формира тесно грло, поради што често доаѓало до периодични поплави и преливања на реката која правела огромни штети.

"Crna" (Black) River (Црна Река) with part of Pelagonia

Skochivir (Скочивир) village in Novaci MunicipalityВо околината на село Скочивир постојат неколку антички локалитети, како доказ за богатото минато на овој регион. Градиште, Кале – Петалинско и Марково Кале се утврдени населби од железното време, а не смее да се заборави и Скочивирскиот натпис, врежан на карпа веднаш до Црна Река.

Село Скочивир има атар со зафатнина од 90,5 км2 и слава на селото е Петковден. Во селото постои храмот Св. Петка, изграден во 1860 г а во близина се наоѓа и надалеку познатиот манастир Св. Архангел Михаил.

Црква Св. Петка

Црквата Св. Петка во село Скочивир е изградена во 1860 година. Сместена е во горниот дел од селото и во нејзиниот двор се наоѓаат селските гробишта и гробови од Првата светска војна. Црквата е со богат фрескоживопис кој е во релативно лоша состојба.

Манастир Св. Архангел Михаил

Monastery St. Archangel Michael, Skochivir villageСпоред преданието манастирот е основан во 1870 г. по иницијатива на младата Анѓа, на која и се сонило дека треба да преноќи во месноста Џајкова чука и тука да остави некој нишан.
Со текот на годините на тоа место е изградено и мало манастирче посветено на светецот Архангел Михаил, до изворот за кој што мештаните веруваат дека е света лековита вода. Во 1967 г од страна на месното население, започнато е со изградба на новиот дом на Св. Архангел Михаил нешто погоре од старото манастирче. Овој објект е реновиран во 1998 г кога се изградени и конаците, едни од најубавите во овој регион.

Крст над село Скочивир

Неодамна на ридот спроти село Скочивир, во близина на Манастирот Св. Архангел Михаил, е изграден метален крст. До Крстот води асфалтен пат и доколку сте во близина на село Скочивир, не пропуштајте да го посетите, пред се поради прекрасните панорами кон околината на село Скочивир.

Излетничко место Коњарка

Konjarka picnic location near village Skochivir, Novaci MunicipalityКоњарка е излетничко место на околу 2 км од село Скочивир. Сместено покрај чистата Коњарска Река, чие што извориште се наоѓа под Кајмакчалан, до границата со соседна Грција на надморска височина од 2.260 м.
Коритото на Коњарска Река е насочено кон запад, а целиот слив е формиран во шумско подрачје. Во Црна Река се влива под ридот Врх на надморска височина до 550 м. Долга е 15 км, зафаќа сливна површина од 63 км2 и има релативен пад од 114‰, кој се вбројува меѓу најголемите во Македонија.

Врв Кајмакчалан

Kajmakcalan peak - Nidze mountain, Macedonia

Кајмакчалан е највисок врв на Ниџе планина (2.521 m) и една од клучните позиции на Македонскиот фронт за време на Првата светска војна. Врвот Кајмакчалан се наоѓа на самата гранична линија помеѓу Македонија и Грција и од таму се гледаат Островското и Петерското езеро во Грција, како и областа Мариово во Македонија. Кајмакчалан се наоѓа на околу 30 км од село Скочивир, по шумски пат во правец на излетничкото место Коњарка.



Село Скочивир за време на Првата светска војна

View toward village Skochivir during WW1За време на Првата светска војна село Скочивир во есента 1916 година било на самата фронтова линија, а подоцна борбите се преместиле на само неколку километри, па истото станало важна комуникациона точка за силите на Антантата.
Во близина на селото и денес е познат т.н „Француски пат“ кој ги поврзувал селата Скочивир и Чегел (денес напуштено), а исто така постоела и жичарница помеѓу овие две села која служела за доставување на воен материјал.

The local population in Macedonia works on the "French road" near village Skochivir, during the first world war.

Mother with children making bread in "furna" (owen) - location somewhere near villages Dobroveni and Skochivir

Family in Skochivir village Macedonia during the First World War

 View toward Skochivir village during the First World War - the white object is the bell tower of the church St. Petka built in 1860 Во 1916 година во Солун била формирана болницата на руската принцеза Александра Наришкина, од која покасно бил формиран и оддел во село Скочивир, а во 1917 година во близина на селото била стационирана и полска болница на Шкотските жени.
Ова на некој начин ги објаснува и големиот број на гробови од Првата светска војна кои можат да се видат на две обележани гробни локации во близина на селото.
Прва локација е црквата Св. Петка, која се наоѓа во горниот дел на село Скочивир, каде воедно се и селските гробишта, а втора локација се гробиштата кои се наоѓаат на околу 1.5 километри од селото, на патот кој води до Кајмакчалан, а поминува низ излетничкото место Коњарка.
И на двете локации, гробовите се од војници кои се бореле во Српската војска.

Back
Next